මීවිතෙන් ගිනි කණ වැටුණ් ඇස
කාගෙ රුවදෝ ඇ‍ඳෙන්නේ
නිමේෂයකින් ඔබට සැස‍ඳෙන
හිතවතෙකි ඔබ දකින්නේ
භද්‍ර යෞවන මලණුවනි ඔබ
කිමද මධු විත සොයන්නේ
නුරා දාහය නැත නිවෙන්නේ
එයිනි දුක් ගිනි දළු දමන්නේ
ජීවිතේ දියවී යා නොදී
වෙනින් ඔරුවක නැග යමන්නේ
රජරට සේවයේ පන්නරය ලබපු මහින්ද දිසානායක මහතා අතින් ලියවෙන මේ පද ටික ගීතයක් කරන්න භාරවෙන්නෙ ගුණදාස කපුගේ කියන කලාකාරයාට. මේ පද වැල් ටික ඇතුලෙ ගීතයක් වෙනුවෙන් අදහස් තිබුණත් ඒ අදහස කැටිවෙලා තියෙන විදිය සරල බස් වහරකට හැරුණනම් හොදයි කියන කපුගේ මහත්තයගෙ අදහසකින් වෙනත් පද රටාවකට හැරෙමින් ගීතයක් විදියට නිමැවෙන්නේ වගේම ගැයෙන්නෙ පහත ආකාරයට.
රුවක් ඇදෙනවා කවුදෝ එනවා
මීවිත ඇඳිරිය දෑස වසනවා
හද පොදි බැඳි දුක දියකර පාකර
ඔබේ ලොවට මා මොහොතින් එනවා
සොඳුරු යොවුන් විය මල් මග මුල හිඳ
කිම තොල මීවිත පුරවන්නේ........
නුරා විරහ ගිනි නිවාදමන්නයි
සුරා විතින් මා දෙතොල තෙමන්නෙ
නැගුණු නුරාගිනි මී පොද වැටිලා
හතරවටින් දළු ලා එනවා
අවන්හලේ මීවිත තනිකරලා
වරෙන් මලේ පියවර නගලා..........
මේ ගීතය ගැන ගොඩක් තැන්වල මම කියවලා තියෙන දෙයක් තමයි මේක මේ පිරිමි දෙන්නෙක් අතර ඇතිවෙන අසම්මත ප්‍රේමයක් ගැන කියවෙන ගීතයක් කියලා. ඒත් මට මේ ගීතය දැනෙන විදිය ටිකක් වෙනස් හින්දා මට දැණුන විදිය ලියන්න හිතුනා.
මේ "රුවක් ඇදෙනවා කවුදෝ එනවා" කියන පද පේළියෙන්ම කියැවෙන්නෙ අවට පරිසරය වගේම සිදුවෙන කිසිවක් ගැන අව්ධානයක් යොමු නොකර හුදෙකලා වීමට අවැසි අවස්ථාවක් ගැන වෙන්න ඕනෙ. මීවිත ඇඳිරිය කියන්නෙ හවස් යාමයක කළුවර වැටෙන වෙලාවක මත්පැනින් සප්පායම් වෙමින් සිටින කෙනෙක් හෝ මත්පැනින් සප්පායම්ව මත් වුණු පසුව දෑස් වැසුනාක් මෙන් තමා අවට පරිසරය ගැන ඇති අවධානය ගිලිහී යාම වෙන්නත් පුළුවන්. ඒ කෙසේවෙතත් මෙතනින් කියැවෙන අරුත හුදෙකලාව මීවිතෙන් සප්පායම් වන අවස්ථාවක් බව විශ්වාසයි.
හද පොදි බැඳි දුක කුමක්ද කියන ප්‍රෂ්ණයට පිළිතුර ලැබෙන්නේ ඊලග පද පෙළෙන්. ඒ "ඕබේ ලොවට මා මොහොතින් එනවා" කියන තැනින්. මේ ගීතය කරුණාරත්න දිවුල්ගනේ සමග ගුණදාස කපුගේ ශූරීන් ගායනා කරන්නෙ යුග ගීතයක් විදියට. මෙතන සිදුවෙන්නෙ අදහස් හුවමාරුවක් එහෙමත් නැතිනම් හුදෙකලාවට මීවිත එකතු කරගන්න පැමිණි අයෙක් සමග තවත් මීවිතෙන් සප්පායම් වන අයෙක් ඇතිවන කථාබහක්. මෙතනදි "අවන්හලේ මීවිත තනිකරලා" කියන පදයෙන් කියවෙන විදියට මේ අවිවාදයෙන්ම අවන්හලකදි සිදුවන සිදුවීමක් කියන එක පැහැදිලියි. මුල් පද ටිකෙන් හරියටම නොහැගෙන අදහස තව තවත් පැහැදිලි කරගන්න ගීතයේ අන්තරා කොටස් වලින් අවස්ථාව ලැබෙනවා. දැන් පැහැදිලියි. මෙය අවන්හලක දෙදෙනෙක් අතර සිදුවන කථාබහක් වගේම එහි එක් අයෙක් ප්‍රේමයෙන් පරාදව සිටින අයෙක්. ඔහු එම දුක සැහැල්ලු කරගන්න තෝරාගත් ක්‍රමය මත්පැන් පොදක් තොලගාන එක.
"සොඳුරු යොවුන් විය මල් මග මුල හිඳ
කිම තොල මීවිත පුරවන්නේ........"
කියන පදයෙන් පැහැදිලි වෙනවා මේ තරුණයෙක්,තවමත් තාරුණ්්‍යයට පාතැබුවා පමණයි. ඒක රචකායා කියන්නේ සොඳුරු යොවුන් වියේ තියෙන්නෙ මලින් පිරුණූ ලස්සන මගක්. ඒ මගේ මුල ඉන්න උඹ ඇයි මත්පැන් බොන්න මේ අවන්හලට ආවේ? මත්පැන් බීලා බලාපොරොත්තු වෙන්නෙ කුමක්ද ? මේ කියන පැනයට පිළිතුර වෙන්නෙ නුරා විරහා ගිනි නිවාගන්න මම මත්පැන් පානය කරන්න ආවා කියන එක.
"නුරා විරහ ගිනි නිවාදමන්නයි
සුරා විතින් මා දෙතොල තෙමන්නෙ " කියලා කියන්නෙ ඒ දේ.
මෙතනදි මට තවත් දෙයක් හිතෙනවා. ඇත්තටම මේ යෞවනයේ ඉන්න ප්‍රේමයෙන් පැරදුන මනුස්සයා පැරදිලා තියෙන්නෙ එහෙමත් නැත්නම් අත්විඳලා තියෙන්නෙ ප්‍රේමයමද නැතිනම් ආශාවක් පමණද කියන එක. යෞවනයට පාතබන සැනින් තරුණයෙක්ගෙ හිතේ ඇතිවෙන්නෙ ප්‍රේමයද නැතිනම් ඒ ආකර්ශණයද. ඔය කියන විදියට මේ තරුණයා මත්පැන් පානය කරන්නෙ ප්‍රේමය අහිමි වීම නිසානම් ඔහු මේ කාරණය හේතුකරගෙන මත්පැන් පානය කළ යුතුමද? හුදෙක් මෙය තමන් ආකර්ශණය වී සිටි තමන්ට ආකර්ශණය වී සිටි ඇය වෙනත් අයෙකු වෙත ආකර්ශණයක් ලෙන්ගතුකමක් පෙන්වීම හා තමන් හැර ගොස් වෙනකෙකුට ලෙන්ගතුවීම නිසා ඇති වුණු කෝපයට, දුකට සිදුවන දෙයක් වෙන්න හැකියාවක් නැතිද? මට මෙහෙම හැගෙන්නෙ සැබෑවටම මා විශ්වාස කරන ප්‍රේමය තුල තම ප්‍රේමවන්තියගේ සතුට රැඳෙන්නෙ වෙනත් අයෙකු ලගනම් එයට ඉඩ දී එයින් සතුටු වන්නට තරම් ප්‍රේමය බලවත් සිතුවිල්ලක් වියයුතු බැවින්. එසේනම් අවසන මගේ නිගමනය මෙය යෞවනයට අත්පොත් තබන්නකු තවත් එවැන්නියක කෙරෙහි ඇති වූ ආකර්ශණයක දුක්ඛිත අවසානයක් දරාගත නොහැකිව මත්පැනින් සප්පායම්ව එම විරහව, වෙන්වීම හිතින් අකා මකා දැමීමට දරන වෙරක් බවයි. එය පසක් වන්නට මා තුල මතුවන සාධාරණ ප්‍රස්තුතය වන්නේ එය ප්‍රේමයනම් එතැන නුරා විරහගිනි නිවාදැමීමකට වඩා සුන්දර හැගීම් සමුදායකට සමුදීමක් සටහන් විය යුතු බවයි.
මෙතැනදි මේ කථාබහ අතරතුර තමන් මත්පැනින් සප්පායම්ව මත්වූ පසු මේ කථාව අහන මෙතෙක් වෙලා ප්‍රශ්ණ අහපු මේ යෞවනයාට වඩා වයසින් වැඩි දෙවැන්නාට අහන්න ඉඩ නොදීම ඔහු ඔහුගේ දුක කියනවා. ඒ කරුණ පෙන්නන්නෙ ගීතයේ මුල් කොටස වගේම පළමු අන්තරා කොටසත් ආරම්භ කරන ඔහුට ප්‍රථම යෞවනයා දෙවන අන්තරා කොටස ආරම්භ කිරීමෙන්. මේ සරලව සිද්ධවන දෙයයි. යථාර්තය ද මෙයයි. මත්පැනින් මත්වන්නට ප්‍රථම හිතේ සැගවී තියෙන දේ මත්වූ පසු නිරායාසයෙන් ලබැඳියෙකු ඉදිරියේ දිගහැරීම සරල සත්්‍යක්.
නැවතත් පෙර කී අදහස සනාථ කරමින් මත්පැනින් මත් වූ පසු ඊට පෙර පැවති නුරා ගින්න තවත් වැඩි වූ බව සඳහන් කරනවා. මෙය සැබෑවටම ප්‍රේමයනම් වෙන්වීම තුල කථාකරන එකම දෙය නුරාව වීමට ඉඩක් නැති බව මගේ අදහස. එය හුදෙක් ආකර්ශණයම බව පසක් කරමිනුයි මත්පැන් වලට වහල්ව එම ගින්නට දරුණු වෙන්න ඉඩ හසර ලැබෙන්නෙ. මේ තරුණයා පවසන්නෙ තමන්ගේ අහින්සක හිතට දැණුන ප්‍රේමය යැයි වරදවා වටහාගත්ත හැගීමක අවසානය තමන්ට කොතෙක්නම් දුකක් ගෙන දුන්නාද යන්නයි. ඒ තුල ඔහු අද මත්පැනට ලොල් වූවකු බවට පත්ව ඇති බවට කරන පාපොච්චාරණය රචකයා දකින්නෙ මේ ආකාරයට.
"නැගුණු නුරාගිනි මී පොද වැටිලා
හතරවටින් දළු ලා එනවා "
මේ තරුණයා සමග අවන්හලේ එක මේසයක වාඩිවෙලා ඔහුගේ කථාවට සාවධානව සවන්දුන්න මත්පැනින් සප්පායම් වීමටම අවන්හලට පැමිණී අනෙකා ඔහුට වැඩිමහල් අත්දැකීම් ඇති වගේම මත්පැන් පානයේ ආදීනව දන්නා අයෙක්. සමහරවිට ඔහුට මත්පැන් පානය නතර කරන්නට නොහැකිව මත්පැනට ලොල් වූ අයෙක්. නමුත් ඔහු මෙම තරුණයාට අවවාදයක් කරනවා. ඒ අවවාදය, ලෙන්ගතුකම පෙන්වන්නට රචකයා යොදාගන්න පද පෙළ
"අවන්හලේ මීවිත තනිකරලා
වරෙන් මලේ පියවර නගලා"
කියන පදපෙළයි. මේ තුල යමෙකුට නොගැලපීමක් දකින්න අවසර තියෙනවා. ඒ තමයි මත්පැනට ලොල්ව අවන්හලට පැමිණ මත්පැන් පානය කරමින්ම තවත් මත්පැන් පානය කරන්නෙකුට එය නතරකරන්නට උපදෙස් දීම කෙතරම් සාධාරණද ? යන කාරණය මෙහිදී ඉස්මතු වීම. නමුත් මෙහිදි
"ඔවා දෙනු පරහට තමා සම්මතයෙහි පිහිටා සිට "
යන්නට සම්මතයට වඩා තම අත්දැකීම තුල මේ තරුණයාට මෙයින් සිදුවන අයහපත, සිදුවන හානිය දැක තමා මෙන් ජීවිතයේ බොහෝ දුරක් නොගිය යෞවනයට පාතැබුවා පමණක් වන ඔහුට අවන්හලේ මීවිත තනිකරලා පියවර නගලා හැකි ඉක්මණින් එන්න කියන්නෙ ඔහුට තව ජීවිතයේ විඳීන්න ඉතිරිව ඇති සියල්ල නැතිව යාම ඉවසාගත නොහැකි මනුස්සකමක් නිසා මිස සම්මතයට පටහැනිව අවවාද කරන්නටවත්, ඒ තුලින් ඔහුට ඇති වාසියක් නිසාවත් නොවන බව සක්සුදක් සේ පැහැදිලි වන්නේ සහ එය මා විස්වාස කරන්නේ මෙම කථාබහ සිදුවන්නෙ මත්පැන් පානයකරන අතරතුර වගේම මෙම අවවාදය ලැබෙන්නෙ පදමට මත්පැනින් සප්පායම් වූ සැබෑවටම අව්්‍යාජ වුවත් නොවූවත් මේ මොහොතේ එසේ වන අයෙකුගෙන් නිසයි.
අවසන හුදෙක් මෙය මෙම ගීතය පිලිබඳ මගේ හැගීම සහ මට දැණුන දේ පමණයි.....
