සීය මැරිලා තුන් මාසෙට දවස් තුනයි තියෙන්නේ
හතර වරිගෙ නෑ පිරිවර මහ ගෙදරට ඇදෙන්නේ
හත් දවසට වඩා ජයට මේක ගන්ඩ හදන්නේ
අත්තම්මගෙ පර්ස් එකට තමයි හෙමින් විදින්නේ
සීයට තැන තැන වතුපිටි කසු කුසුවක් ඇහෙන්නේ
බැංකු පොතේ සල්ලි වලට දැන් මොනවද කරන්නේ
පිනට දෙන්න මගේ හිතේ අත්තම්මා හිතන්න්නේ
පිස්සු නේද මේ ගෑණිට මාමණ්ඩිලා කියන්නේ
ඉස්පීකර් පහක් හයක් ගෙදර වටේ බඳිමු නේද
කහ බතකුයි කට්ලට් මස් බණ දවසට තියමු නේද
පනස්දාහේ මණ්ඩප්පෙ ගහලා ලයිට් දාමු නේද
ඉකෝ දාලා පිරිත් කියන කොල්ලො ටිකක් ගේමු නේද
දානෙ දවසෙ හවසටනම් බොන්න ටිකක් දෙන්න වේවි
හොටෙල් එකෙන් බයිට් ටිකත් අරන් එන්න ලේසි වේවි
බෝතල් ටික ලොකු අයියා අඩුවට හෙට අරන් ඒවි
ඔය කිව්වට බියර් ටිකක් නැන්දලටත් බොන්න වේවි
අර රැව්ල වවපු හාමුදුරුවෝ සීලවන්ත නැති හින්දා
තට්ටෙ ගාලා ශේව් කරපු සාධුලාට මම වැන්දා
එහෙම කියපු ඉතාලියේ ලැට් හෝදපු පොඩි නැන්දා
සීය මැරිලා හත් දවසෙන් තුන්වෙනි පාරට බැන්දා
සීයට වඩා වැදගත් අය කවුරුවත්ම නැහැයිලූ
ඉස්පිරිතාලෙදි බලන්න ආවෙ නැත්තෙ බිසීලූ
මරණ ගෙදර දා ආවෙත් හරිම අමාරුවෙන්ලූ
පොඩි පුතාට සීයගෙ දේපල චුට්ටක් ඇතියිලූ
සාමණේර හාමුදුරුවො තේරුමක්ම නෑ අම්මේ
හාමුදුරුවො පණහක්වත් වඩම්මවා ගමු ගැම්මේ
නැන්දල ටික හරි හරියට ප්ලෑන් කරනකොට පිම්මේ
අත්තම්මා උතුරු සළුව හෝදලා අව්වට දැම්මේ
එහා ගෙදර එකට වඩා අපි ලොකුවට ගන්ඩ ඕනෙ
හාමුදුරුවො සේරටෝම අටපිරිකර දෙන්ඩ ඕනෙ
අත්තම්මව හෙට උදේම බැංකු එක්ක යන්ඩ ඕනෙ
අද නැත්තන් හෙට මොකටද පොත හූරලා ගන්ඩ ඔනෙ
දරු රෑනම එක පාරම ගෙදර ඇවිත් හින්දා
අත්තම්මා එකතු කරපු සල්ලි කැටෙත් බින්දා
ඉඩම් ටිකත් යන්න කලින් සීයා බෙදපු හින්දා
අත්තම්මා පහන තියලා බුදු සාධුට වැන්දා
No comments:
Post a Comment